猜猜我是誰？

各位早晨！大家能否猜得出相中人物是誰呢？冇錯嘞，佢就係去年退休的楊Sir。他可謂退而不休，我在他身上感受到他對老師呢份工作既熱愛，雖然離開左我地，仍然掛住啲學生，成日番離學校，現在仲做番代課老師添，他一直深受學生愛戴，有相為証架。 

如果每個人都好似楊Sir咁找到佢一生中最愛的工作就最好啦，但人生豈能盡如人意呢！我好記得自己當年讀完中學之後，入讀左當時叫做師範既教育學院，入面有不少人諗住再報考多一次大學，將教育學院當做臨時庇護站，諗住得過且過咁返學、上堂，就在開學日迎新時校長便同我地班新生講左一番說話：他說無論你日後決定走哪一條路都好，你呢一年如能夠投入學校的生活，便一定會有所得著，不會浪費。 

我覺得院長呢一番說話在很多時候都適用，講真，好鍾意讀書或者是鍾意在學校環境學習的人有幾多，咁是否話唔鍾意就任得自己求求其其，渾渾噩噩咁讀完6年就算呢！  

老師自己呢幾年有練習長跑，覺得處境同好多同學都好近似，就等我同大家分享一下啲經驗，希望對大家有用，首先我一直都唔係咁鍾意跑步（我同一般男士一樣鍾意踢波多過跑步），只不過多少受到一啲壓力才半被迫之下開始練習長跑，情形就好似好多同學唔係咁鍾意讀書咁；至於我的跑步成績就更加唔好提，我從來沒有在公開比賽中得獎，正如學校全級頭三名只屬於少數。

驅使我繼續練落去的原因是：既然係唔係都要練，點解唔練好啲，或者再花啲時間去練，認真啲去練咁，就係咁，練下練下，就有啲進步，雖然進步好微少，但因為係自己努力過後既結果，所以都會有啲滿足感。同學在讀書keep住一段時間之後，總會有啲進展，而呢種進展往往就令自己繼續讀落去既推動力，所以同學當遇到困難就唔好咁快放棄呀。 

講多少少啦，頭先講到話受壓之下才練習長跑，其實同我一起跑步既係我既太太，我有時放工番屋企時非常累，想訓覺，係佢拉埋我落街練習，有時又調番轉頭由我叫番佢去一齊跑，就係咁樣先至堅持到依家，所以我建議同學找一兩個志趣相近的同學一起讀書温習，互相支持同鼓勵，如果覺得自己是比較勤力的，就更加要幫下自己既老友，除左玩facebook吹下水，分啲時間face to face咁讀下書，互相幫助，總好過單打獨鬥。

我今日分享既係咁多，希望對大家有用，有機會再同大家傾過。

2011年2月10日